Членовите од регионалниот центар „Исток“ во состав на ЗНМ, во саботата на 16 јануари одржаа состанок во Штип. На состанокот присуствуваа и Насер Селмани, претседател на ЗНМ, Драган Секуловски, извршен директор и членовите на УО Столе Наумов, Иван Бојаџиски како и новинарот Зоран Фидановски.

На барање на членството од центарот „Исток“ за актуелните политички случувања во државата во однос на реформите во медиумскиот сектор и ослободувањето на медиумите од политичките притисоци зборуваше претседателот Селмани. Тој ги запозна присутните со тековните активности на ЗНМ во насока на преговорите за медиумите кои се одвиваат меѓу политичките партии. Во овој дел се надоврза и Секуловски кој зборуваше околу тековните но и идни проектни активности на ЗНМ кои се поддржани од меѓународната заедница.

Иван Бојаџиски, координатор на центарот „Исток“ даде отчет за работењето во минатата година. Координаторот потенцира дека членовите на ЗНМ од овој центар имале плодна година преку организација на повеќе средби и дебати на актуелни теми кои се одржувани во различни градови. Претставници на овој центар присуствувале и на повеќе обуки во организација на ЗНМ. Kaко посебно значајна беше издвоена обуката за начинот на информирање во изборно време оддржан во Крушево, а на која обука присуствуваа и членови на овој Центар.

Како посебно значајно кое го има подигнато кредибилитетот и угледот на седмата сила и на ЗНМ, беше издвоена организацијата на манифестацијата „Најдоброто од истокот“ на која новинарите од овој регион ги избраа најдобрите репрезенти на регионот за 2014 година во 12 области.

На состанокот беше извршен избор на најдоброто од регионот за минатата 2015 година, а беше донесена и одлука оваа манифестација да се одржи во втората половина на месец февруари, 2016 година, во ресторанот „Москва“ во Свети Николе.

Пред почетокот на состанокот со едноминутно молчење му беше оддадена почит на прерано починатиот член на ЗНМ од центарот „Исток“ – Зоран Двојаковски, кој долги години го финансираше и уредуваше пораталот Males.net
Беше донесена и одлука на нашиот покоен колега посмртно да му биде доделено посебно признание за неговата силна посветеност и големиот придонес во медиумската сфера. Признието ќе биде врачено на вечерта на која свечено ќе биде прогласени најдобрите од истокот.