Советот на честа при ЗНМ разгледувајќи ја претставката на МВР во врска со инцидентот на фудбалскиот натпревар во село Волино, Дебрца на 08 септември и известувањето на дел од медиумите за него (Expres.mk, Alfa.mk и Netpress.com.mk) заклучи дека објавените информации не се потпишани со името на авторот, недостасува втората страна и не содржат официјално известување од надлежниот орган. Советот на честа нема надлежност да реагира во однос на медиумот, но сепак, сметаме дека посочените медиуми ги прекршиле членовите 1 и 10 од Новинарскиот кодекс:

Член 1 – Новинарот има право на слободен пристап до сите извори на информирање што се од јавен интерес. Новинарот треба да објавува точни, проверени информации и нема да прикрива суштински податоци и да фалсификува документи. Доколку информацијата не може да се потврди, или станува збор за претпоставка, односно шпекулација, тоа треба да се каже и да се објави. Точноста на информацијата треба да се провери колку што е тоа можно.

Член 10 – Новинарот нема свесно да создава ниту преработува информации што ги загрозуваат човековите права или слободи, нема да говори со јазикот на омразата и нема да поттикнува на насилство и дискриминација по која било основа (национална, верска, расна, полова, социјална, јазична, сексуална ориентација, политичка…).

Подносителот на претставката го упатуваме да се обрати и до Советот за етика во медиумите на Македонија, а посочените медиуми ги повикуваме јавно да се извинат, да објават деманти и да ги потпишуваат објавените текстови со име на новинар или редакција.