Советот на честа на Здружението на новинарите на Македонија ја разгледа претставката на Министерот Дамјан Манчевски за објавената вест на веб порталот Вечер.мк за текстот со наслов: „Дамјан Манчевски поттикнува насилство и повици за ликвидација“ објавен на 25.08.2019 година и го заклучи следново.

Советот оценува дека веб порталот Вечер.мк без оглед на непотпишаниот текст го прекршил Новинарскиот кодекс во членовите 13 и 16. Според членот 13 од новинарскиот кодекс на ЗНМ, новинарот треба да прави разлика меѓу фактите и мислењата, меѓу веста и коментарот, додека според членот 16: новинарот ќе ги чува угледот и достоинството на својата професија, ќе ги поттикнува заемната солидарност и различност на ставовите и нема да го употреби својот медиум за пресметка со личности вклучувајќи ги и своите колеги.

Оттаму го повикуваме Вечер.мк кога објавува вакви вести и коментари текстовите да бидат потпишани со конкретно име на новинар или како редакциски коментар. Истовремено, ги потсетуваме на обврската на објавување демант наместо бришење на веста.