Обука за саморегулација и промоција на публикацијата „Етичко известување на медиумите во Европа“

Здружението на новинарите на Македонија организираше обука на тема „Саморегулација како основен предуслов за слободни медиуми“. Во улога на обучувачи беа Марина Тунева, директорка на Советот за етика во медиумите на Македонија и Александар Кашумова, медиумски експерт и поранешен директор на Советот за етика во Бугарија.

На обуката учествуваа членови на СЕММ и Советот на честа при ЗНМ кои имаа можност да се запознаат со најдобрите европски практики и искуствата на Советот за етика во медиуми на Бугарија.

По завршувањето на обуката ЗНМ ја промовираше својата најнова публикацијата „Етичко известување на медиумите во Европа“ чии автори се Марина Тунева и Фиљана Кока.

Авторката на публикацијата Марина Тунева, ја истакна важноста на етиката во насока на градење на доверба кај јавноста, а се осврна и на предизвиците во новинарската професија. „На патот на доброто новинарство, како глобално, така и кај нас, постојат пречки и предизвици. Токму поради тоа потребни се сеопфатни инвестиции во новинарството, со цел тоа да ја врши својата обврска за демократијата. Оваа публикација меѓу другото, има за цел да покаже каде се предизвиците, но и кои практики може да помогнат на новинарството“, истакна Тунева.

Целата публикација можете да ја прочитате на следниот линк.

Оваа публикација е изготвена со помош на Европската Унија. Содржината на публикацијата е единствена одговорност на ЗНМ и на никаков начин не може да се смета дека ги одразува гледиштата на Европската Унија.