Обука за безбедноста и етиката на фоторепортерите

• 

• 

Здружението на новинарите на Македонија во петокот организираше еднодневна обука за фоторепортери на тема „Безбедноста на фоторепортерите и професионалната етика“, на која учествуваа околу дваесетина најискусни фоторепортери од Скопје.

Фоторепортерот Роберт Атанасовски на почетокот на обуката го претстави прирачникот за следење на настани од висок ризик изготвен од американскиот фотограф Мет Лутон, во кој се претставени меѓународни стандарди и процедури што се применуваат кога фоторепортери известуваат од настани со висок ризик. Атанасовски ги објасни условите за безбедно сликање што треба да се исполнат пред уредникот да го упати фоторепортерот на задача. Освен тоа, тој ги претстави и основните етички стандарди на фоторепортерите кои треба да ги почитуваат во текот на работата.

Фоторепортерот Томислав Георгиев, преку конкретни слики на колегите им илустрираше ситуации кога фоторепортерите поради лошата проценка, биле изложени на ризици. Според него, за да се избегнат непријатните ситуации, фотографот треба да  биде добро информиран за настанот што го слика и да има лични контакти со локални актери.

Во текот на дискусијата, колегите ја поздравија иницијативата на ЗНМ да изготви прирачник за безбедноста на фоторепортери и побараа тој да биде изменет и надополнет во согласност со македонските прилики. Тие се пожалија дека речиси секојдневно се попречени во извршувањето на нивните  професионални обврски.  Беше побарана ЗНМ да иницира средба со претставници на Министерството за внатрешни работи, каде ќе се разговара за обезбедување на нормални услови за непречена работа на фоторепортерите кога покриваат настани или протести.

Според нив, во прирачникот треба да се вградат сите законски права и обврски на фоторепортерите кога се на работна задача, со цел да знаат точно што смеат, а што не смеат да сликаат.

Инаку, прирачникот за безбедноста и етиката на фоторепортери американскиот колега Лутон го изготви за потребите на македонските колеги во рамки на прoект на ЗНМ во соработка со Амбасадата на САД во Скопје. По консултациите со колегите планирано е пред изборите прирачникот да се издаде и да се дистрибуира до медиумите.

Освен тоа, колегите ја поддржа идејата да се зачленуваат во ЗНМ и да формираат секција во рамките на Здружението. Со тоа ќе зајакне солидарноста меѓу колегите и полесно ќе можеме да со соочиме со заедничките проблеми.

Овој проект е поддржан од Американската амбасада во Скопје.

25 октомври 2016 година, Скопје