Новинарски прирачник за следење избори
Здружението на новинарите на Македонија во соработка со Канцеларијата на Фoндацијата Конрад Аденхауер во Скопје, изготви Новинарски прирачник за следење на избори, кој треба да им помогне на новинарите на професионален начин да известуваат за кампањата на предвремените парламентарни избори што треба да се одржат на 11 Декември во Македонија.
Во првиот дел на прирачникот кратко се објаснува улогата на медиумите во демократски земји, а има и практични совети за новинарите како да известуваат за изборни нерегуларности и на што треба да внимаваат новинарите кога покриват избори во млади демократии.
Во Прирачникот се опфатени основните стандарди на новинарството што се применуваат во Македонија и во светот, со цел да ги потсетат новинарите на обврската да известуваат точно, непристрасно и избалансирано за учесниците во изборната кампања. Посебно внимание е посветено на известувањето на Јавниот радиодифузен сервис, кој како сервис на граѓаните има посебна одговорност за медиумско покривање на изборите.
Професионалното известување на новинарите за кампањата е еден од клучните предуслови за организирање на слободни и веродостојни избори. Без квалитетни и навремени информации, граѓаните не можат самостојно да донесуваат одговорни одлуки на денот на изборите.
Освен професионалните принципи содржани во Кодексот на новинарите на Македонија и во Кодексот на Меѓународната федерација на новинарите, во прирачникот се соддржани и законските обврски на медиумите, предвидени во последните измени на Изборниот законик, усогласени помеѓу потписниците на Пржинскиот договор.
Во посебен дел е обработен делот за обврската на Агенцијата за медиуми да го мониторира начинот на известување на медиумите сто дена пред денот на изборите, во кој кратко се објаснуваат условите под кои медиумите и новинарите можат да бидат казнети доколку известуваат пристрасно, необјективно и неизбалансирано за учесниците на изборите.
Пред официјалното започнување на изборната кампања ЗНМ ќе ги дистрибуира прирачниците до редакциите на сите македонски медиуми за да им ја олесни работата во следењето на изборната кампања и за изборните нерегуларности. Прирачникот е печатен на два јазика, македонски и албански јазик.
Скопје 14.11.2016
Здружение на новинарите на Македонија
Новинарски прирачник за следење на избори
