Новинарите од центарот „Исток“ : Згаснуваат медиуми, новинари остануваат без работа

Новинарите од регионалниот центар „Исток“ имаа дебата за состојбите во новинарството во нашата држава. Дебатата се одржа во Берово, на 17 јуни 2017 година.

Беше анализирано едно истражување на оваа тема спроведено од новинарски тим од овој центар. Истражувањето се однесуваше на состојбите со и во медиумите и новинарите во Источниот, Југоисточниот и Североисточниот регион. Според ова истражување состојбите во медиумите и кај новинарите надвор од Скопје е се полоша, бидејќи се повеќе се затвораат медиуми со што се повеќе новинари остануваат без работа, а граѓаните остануваат без потребниот квантум и квалитет на информации.

Во исто време платите на факултетски, млади и од средната генерација обрзовани новинари се речиси минимални, иста е положбата и со камермани, техничари и сите вработени во електронските и печатените медиуми.

Посебно е апострофиран фактот дека МРТВ како национален сервис и МИА како национална агенција за информации кои ги плаќаат сите граѓани на оваа држава кон внатрешноста на државата се однесуваат игнорантно, непрофесионално, неодговорно…Тие немаат редовно вработени дописници, хонорарци им вршат работа без да им бидат платени патни трошоци и без да им се обезбедат технички услови за работа.

Новинарите од регионот се загрижени поради реалната можност (финансиски проблеми) да згаснат повеќе регионални и локални медиуми, со што не само што ќе бидат погодени припадниците на оваа убава и потребна професија, туку ќе им се наштети на граѓаните кои не живеат во главниот град  во однос на  секојдневни, за нив значајни информации. Сето ова звучи посебно загрижувачки ако се знае дека информацијата, навремена, квалитетна и праведна, е основа за напредок на секое општество.

Штип, 18.06.2017

Иван Бојаџиски