НАЈАВА: Регионална конференција: Слободата на медиумите и безбедноста на новинарите на Западен Балкан

Независното здружение на новинарите на Србија во соработка со пет здруженија од регионот меѓу кои и Здружението на новинари на Македонија, денеска отвора дводневна регионална конференција на која ќе бидат претставени резултати од истражувањето за нивото на медиумската слобода и безбедноста на новинарите на просторот на Западен Балкан. Компаративната анализа ќе даде одговори на прашањата како земјите во регионот ќе се рангираат кога се во прашање правната заштита на медиумите и новинарските слободи, положбата на новинарите и редакциите, професионалната етика и нивото на цензура, како и безбедноста на новинарите и неказнивоста на нападите врз нив.

Истражувањата кои се реализирани од здруженијата во Србија, Босна и Херцеговина, Македонија и Косово и синдикатот во Црна Гора, покажаа дека на територијата на Западен Балкан:

• Законите кои ја гарантираат слободата и плурализмот на медиумите не се применуваат во пракса,
• Приближно 70% од новинарите сметаат дека нивната економска положба драматично е опадната, но од страв дека ќе ја загубат работата не се здружуваат во синдикати,
• На работата на повеќе од половина од новинарите влијание има стравот од тужба, а ист процент на испитаници рекле дека на нивната работа влијае и цензурата
• Од 2013 година, 86 новинари биле физички нападнати, додека пак, ниту една држава нема ефикасни механизми за заштита на новинарите
• Од 1996 година, убиени се 7 новинари – извршителот не е откриен во ниту еден случај

Претседателот на ЗНМ, Насер Селмани  ќе има излагање во панелот насловен како „Безбедност на новинарите“ заедно со Мартина Силвестри, претставник на Советот на Европа на овој настан.

Наодите од регионалното истражување ќе бидат претставени од д-р Снежана Трпевска, главен истражувач, а по воведниот говор, резултатите ќе бидат коментирани од другите учесници, вклучувајќи ги и претставниците на Здружение/Задруга на Босна и Херцеговина, Хрватското новинарско друштво, Здружение на новинарите на Македонија, Здружение на новинарите на Косово и Синдикатот на медиуми на Црна гора.

Истражувањето  е спроведено во рамките на проектот Регионална платформа за заговарање на медиумските слободи и безбедноста на новинарите во рамките на Западен Балкан чија реализација е поддржана од Европската комисија и Министерството за култура и информирање на република Србија.

06.12.2016 година, Скопје