Доделени наградите за конкурсот: „Награда за професионално известување за состојбата на бегалците при мешаните миграциски движења за 2016 година во Македонија“

Здружението на новинари на Македонија и Македонското здружение на млади правници во соработка со Канцеларијата на високиот комесаријат за бегалци на Обединетите Нации во Скопје, ги доделија наградите за конкурсот за „Награда за професионално известување за состојбата на бегалците при мешаните миграциски движења за 2016 година во Македонија“.

На настанот кој се одржа во Клубот на новинари се доделија награди за три категории: емисија, прилог или краток документарец, напис или серија написи како и категоријата за најдобра фотографија.

Првото место за категоријата најдобра фотографија го понесе Роберт Атанасовски за фотографијата под наслов „Девојка со куфери“ објавена во Frans Press и на порталот МКД.

Во категоријата напис или серија написи првото место и припадна на Марија Тасев за написот „Во моето убаво Алепо сега има само барут и смрт“ објавен во дневниот весник Дневник.

Милка Смилевска беше добитничка на првото место во категоријата за емисија, прилог или краток документарец. Таа првото место го заработи со прилогот „Заглавени во меѓу зоната“ објавен на телевизијата Aljazeera.

Дел од комисијата за избор на наградата беше и претставникот на ЗНМ Столе Наумов кој во своето обраќање ја истакна важната улога на новинарите за време на мигрантската криза. „Голема чест за ЗНМ е да биде дел од оваа бескрајно хумана димензија. Додека политичарите, владите, државите правеа  огради и ѕидови, новинарите и фоторепортерите со своите фотографии и стории ги рушеа тие ѕидови, ја провоцираа свеста и совеста за бегалците, предизвикуваа акција иако за жал и ти поради притисокот, затварање и умирање на медиумите како и не исплаќање на плати во оваа држава се чувствуваат како мигранти“ истакна Наумов

На настанот свое обраќање имаше и претставникот на УНХЦР Скопје, господинот Мохамад Ариф. Тој во своето обраќање ги поздрави новинарите за сите напори кои ги вложуваат во подигнувањето на свеста кај јавноста за страдањето на бегалците. „Цврсто сум убеден дека ако на кој било хуманитарец му се даде шанса да ја избере својата кариера одново, тој или таа би го направиле истиот избор одново, а истото би го направил и јас, бидејќи не постои ниту една активност којашто е повредна од помагањето на најранливите. Тука би сакал да ги споменам и медиумски работници – без вас, не би можеле да ја подигнеме свеста за страдањето на бегалците на начинот на кој го правиме тоа“, заклучи г. Мохамад Ариф.