Собранието на ЗНМ ги усвои измените и дополнувањата на Правилникот за работа на Советот на честа

Собранието на Здружението на новинарите на Македонија (ЗНМ), на редовната седница одржана на 9 јули 2026 година, ги усвои измените и дополнувањата на Правилникот за избор и работа на Советот на честа.

Измените беа предложени од членовите на Советот на честа а имаат за цел да ја направат работата на Советот поефикасна, потранспарентна и пофункционална, преку појасно уредување на неговите надлежности, постапките и начинот на работа.

Со новите решенија се овозможува Советот, покрај постапувањето по претставки, да може и по сопствена иницијатива да отвори постапка кога ќе утврди можно прекршување на Кодексот на новинарите на Македонија. Исто така, се создава можност во неговата работа, кога тоа е потребно, да бидат вклучени надворешни експерти и Стручната служба на ЗНМ, со цел одлуките да бидат дополнително аргументирани и стручно подготвени.

Со измените се воведува можност седниците да се одржуваат и по електронски пат, како и електронско гласање во случаи кога тоа е неопходно за навремено постапување. Дополнително, се уредуваат решенија што треба да обезбедат непречена работа на Советот и во ситуации кога некој од неговите членови подолг период не е во можност да учествува во работата.

Правилникот предвидува и пократки рокови за постапување, а се доуредува и постапката за разгледување на претставките, со што се зајакнува правото на одговор на членот против кого е поднесена претставката и се обезбедува пофер и потранспарентна постапка.

Една од новините е и воведувањето појасен систем за постапување во случаи на повторени прекршувања на Кодексот на новинарите на Македонија. Во тие случаи, Советот на честа ќе може да изрече јавна опомена, односно да предложи исклучување од членството во ЗНМ, согласно условите утврдени во Правилникот и надлежностите на Управниот одбор.

Измените ги следат и промените во современото медиумско опкружување, па Советот ќе може да постапува и по новинарски содржини објавени преку дигитални платформи и социјални мрежи, кога тие имаат карактер на новинарски производ и се поврзани со примената на Кодексот на новинарите на Македонија.

Со усвојувањето на овие измени, ЗНМ продолжува да ги унапредува механизмите на професионална саморегулација и да го зајакнува системот за заштита на професионалните и етичките стандарди во новинарството.

Новиот текст на овој правилник е достапен на овој линк

Советот на честа е саморегулаторно тело на новинарите во Македонија. Неговата основна задача е да се грижи и да ги промовира етичките принципи, критериуми и стандарди на професионалното и одговорно новинарство наведени во Кодексот на новинарите на Македонија.