ЈАСНО.МК гласно во битката против дезинформации

Здружението на новинарите на Mакедонија (ЗНМ) во соработка со Програмата за развој на Обединетите нации (УНДП) денеска ја презентираа дигиталната платформа ЈАСНО.МК.

Целта на оваа платформа е квалитетни новинари да создаваат приказни кои што ќе донесат промена и што е најважно ќе ја презентираат информацијата до граѓаните кои се надеваме во иднина ќе знаат од каде да црпат точни и проверени информации. Родовата дискриминација е значајна компонента во оваа фаза на сајтот. Локалните заедници страдаат од низа дезинформации кои влијаат на родовиот јаз.

Јасно.мк ќе ги потенцира овие случаи но истоврeмено ќе служи и за уривање на штетните стереотипи и предрасуди креирани преку лажни или погрешни информации. Преку ресурсите кои ги нуди ги опремува и граѓаните и новинарите да препознаат дезинформации, особено во областа на родовите дезинформации.

Пред присутните гости, свое обраќање имаше Претседателот на ЗНМ Младен Чадиковски којпосочи дека новинарите се чувари на демократијата, на кои им е доверена одговорноста да им обезбедиме на граѓаните веродостојни информации.

,,Сакаме со оваа платформа да воспоставиме ново ниво на препознавање на дезинформации, на читање нови квалитетни медиумски производи. ЈАСНО.МК има за цел да придонесе во процесот на кревање на свеста и зајакнување на капацитетите на локалните заедници кои на овој начин би биле повеќе подготвени да препознаат дезинформации и да се борат со оваа појава, посебно во делот на родово базирани дезинформации.”, потенцираше Чадиковски.

Постојаниот претставник на УНДП во земјава Армен Григорјан истакна дека ,,Јасно.мк не е само уште еден медиум; тоа е посветена платформа за вести од малите градови, дизајнирана да ги изнесе автентичните гласови и приказни кои често остануваат незабележани. Во ерата на преоптоварување со информации, ја препознавме потребата за платформа која се залага за квалитетна локална содржина, а истовремено ќе се бори против дезинформациите.“, рече Григорјан.

Дигиталната платформа ЈАСНО.МК е достапна на македонски и на албански јазик.

Оваа иницијатива е овозможена преку заедничките напори на Здружението на новинарите на Македонија (ЗНМ) во партнерство со Програмата за развој на Обединетите нации (УНДП). Проектот е насловен „Зајакнување на капацитетите на локалните заедници за справување со погрешни информации и дезинформации засновани на пол“.