Чадиковски: Обвинителството да го прекине прогонот кон колегата Момироски

Претседателот на Здружението на новинарите на Македонија (ЗНМ), Младен Чадиковски вчера беше гостин во Утрински брифинг каде говореше на неколку важни и актуелни теми. Истакнати беа активностите кои ЗНМ ги имаше во изминатиот период, а посебен акцент стави на дводневната регионална конференција која се одржа на 25 и 26 ноември во Скопје, чија цел беше унапредување на дијалогот меѓу парламентите и новинарите од Западен Балкан и нејзиното значење.

Чадиковски во гостувањето во Утрински брифинг ја нагласи потребата од реформа на менталитетот на претставниците во законодавниот дом кои се избрани од граѓаните.

Исто така претседателот на ЗНМ ја истакна потребата да се надмине проблемот со неказнување на напаѓачите на новинарите, постапка која се губи во триаголникот: МВР, обвинителство и судови, што пак остава лоша порака пред јавноста, а на тој начин насилниците сметаат дека можат да удрат, нападнат и навредат, а притоа да не бидат казнети.

Чадиковски се осврна и на случајот со колегата Горан Момироски при што истакна дека очекува обвинителството да ја одбие кривичната пријава против него:

„ЗНМ секогаш нуди опција за помош во вакви случаи, како на пример бесплатна правна помош, но пред се треба да видиме што точно се случува за да можеме да го кристализираме ставот во однос на тоа – дали во 2021 година, во време кога сакаме да зборуваме за медиумски промени, кога сакаме да кажеме дека сме една од понапредните земји во регионот во овој период, непотребно е да се заканува една владина институција со кривична пријава за која казната е затвор. Времето за затвор на новинарите за Македонија заврши и наша должност е да го следиме да не се повтори .“

Целиот разговор можете да го проследите на видеото во прилог.