Средба со новинари и медиумски работници од регионален центар Штип

Силни заложби во креирање на Фонд за медиумски плурализам, обуки и поддршка на новинарите и снимателите во регионалните центри на ЗНМ, изработка на специјализирана платформа за Веб содржини поврзани со дезинформации, повеќе бенефиции за членовите на ЗНМ, се дел од темите на кои се разговараше на средбата на претставниците на ЗНМ со новинарите и медиумските работници од штипскиот регионален центар.

Претседателот на ЗНМ, Младен Чадиковски во своето обраќање зборуваше за новинарскиот протест одржан на 17 ноември чија цел беше да се истакне неправдата нанесена со последната пресуда против Истражувачката репортерска лабораторија (ИРЛ), со која судот си додели улога да одредува кој смее, а кој не смее да биде новинар. Исто така истакна дека новинарите треба да бидат во чекор со времето и трендовите кои ги налага дигиталната ера ако сакаме да го задржиме професионалното ниво.

„Не смееме да дозволиме ваква пракса да се наметне, судии да кажуваат кој смее, а кој не смее да биде новинар. Годинава сме на 38-мо место на „Репортери без граници“ , но таа слика може лесно да се промени и да се вратиме назад. Точно е дека денес, за разлика од минатото имаме поголема слобода на говор, но слободата тешко се освојува, а лесно може да се зафуби. Затоа да бидеме будни, не смееме да дозволиме политички влијанија,и треба да работиме на решевање на предизвиците со финансирање на медиумите, особено во локалната заедница. Ние извесен период наназад работиме на предлог до носителите на законите, а тоа e фонд за медиумски плурализам. Овој фонд треба да придонесе кон креирање на квалитетни новинарски продукти. Истовремено ЗНМ постојано работи на унапредување на капацитетите на новинарите преку организација на обуки и тренинзи, а последната активност е Т-AJM-Тренинг академијата за новинари“ – кажа Чадиковски.

Координаторот на штипскиот регионален центар, Тони Михаилов, се надоврза на Чадиковски во однос на активностите кои ЗНМ ги има во план за реализација во следниот период, како и бенефициите кои новинарите ги добиваат со членството во ЗНМ:

„Би сакал да истакнам дека е навистина важност сите ние да бидеме уште повеќе ангажирани во активностите, поточно обуките кои Здружението ги организира, за кои сметам дека се од голема професионална корист за сите нас кои работиме во медиумите. Имаме и дополнување на листата со бенефиции кои што се однесуваат на овој регион“ – рече Михаилов.

Извршниот директор на ЗНМ, Драган Секуловски зборуваше за настаните кои изминаа минатиот период, како и за новитетите кои следат, а се однесуваат на членовите на ЗНМ:

„На 2-ри ноември го одбележавме Меѓународниот ден за прекинување на неказнивоста на злосторствата врз новинарите со настан на кој беа објавени  три посебни јавни обвинители за тетовското, битолското и штипското апелационо подрачје. Сметам дека ова претставува значаен чекор напред во подобрување на состојбата на новинарите во однос на нивната безбедност. За нашите членови, имаме бесплатна и психолошка и правна помош. Околу законите, во моментов се подготвува нов Закон за медиуми каде што има дополнување во делот на онлајн медиумите, односно ќе има блага регулација во оваа област “ – истакна Секуловски.

На крајот се обрати и претседателот на Советот на честа при ЗНМ, Саше Димовски кој ја престави работата на новиот состав, а воедно апелираше за поголема внимателност при објава на новинарски текстови, како и пренесување на комерцијалните соопштенија од бизнис секторот:

„Во изминатите месеци откако функционира новиот состав на Советот на честа имавме навистина завидна бројка на претставки, од кои голем дел се однесуваа и на објави на социјалната мрежа на ФБ. Во оваа насока, на последниот состанок, донесовме нова одлука каде решивме дека советот нема да постапува по претставки кои се однесуваат на ФБ објави на лични профили, туку ќе се постапува по претставки каде што ФБ се употребува како медиум. Исто така, би сакал да повикам на поголема внимателност при објава на текстови, посебно на комерцијалните ПР текстови, бидејќи тоа создава основ за исклучување на членство доколку не се почитува доследно Кодексот на новинарите“ – рече Димовски.

Настанот е реализиран во рамките на проектот „Заштита на слободата на изразување и независноста на медиумите како столбови на демократијата во Република Северна Македонија“ финансиран од Европската Унија. Ставовите и мислењата на учесниците нужно не ги одразуваат ставовите на Европската Унија.