Во насока на подобрување на условите за работа на снимателите, Здружението на новинарите на Македонија (ЗНМ) на 6 март организираше двочасовна онлајн работилница наменета за професионални сниматели и новинари. На работилницата, на која беа присутни 20тина учесници, се дискутираше за проблемите и предизвиците при покривањето на настаните во услови на криза, како што е пандемијата, за време на карантин, полициски час, како и во текот на предизборни кампањи.

На почетокот на работилницата претседателот на Здружението на новинарите на Македонија (ЗНМ) Младен Чадиковски поздравувајќи ја оваа иницијатива, како и активноста на секцијата на сниматели при ЗНМ, нагласи дека и статусот на снимателите, како и новинарите е опфатен во заложбите и предлозите за измена на КЗ, во соработка со Министерството за правда, поконкретно во однос на третирањето на нападите кон новинарите и снимателите како напад кон службено лице.

Во улога на панелист Роберт Коцев од ,,Ал Џезеира” истакна дека неретко постојат погрешни перцепции за професијата „снимател“. Им се додаваат дополнителни обврски, коишто не се дел од описот на работното место, нагласи тој. Спoред него, особено е важно да се има предвид и со каква опрема работат, како и дека за одредени настани им е потребен и посебен тип на опрема.

Според Влатко Александров од ,,ТВ Телма” снимателите особено биле изложени на ризици за време на вонредните парламентарни избори, кога морале да следат настани, на коишто неретко не се почитувале мерките за заштита од коронавирусот (како на пример, при партиски прослави). Просторните услови во одредени институции не дозволувале држење на неопходната дистанца, со што снимателите директно биле изложени на ризик. Од особена важност во услови на пандемија, според него е да се води сметка како да се подобрат условите за работа на снимателите за време на претстојните локални избори кои што ќе се одржат идната есен.

И според Зоран Догов од ,,ТВ Канал 5” за време на пандемијата ситуацијата била усложнета, забележувајќи дека во дел од институциите не се запазуваат мерките  во целост, со што директно е загрозена безбедноста на самите сниматели.

Бењамин Хоџа од ,,TV21” истакна дека неретко во редакциите се штеди на опрема, во некои случаи таа е дотраена, несервисирана, па се појавуваат и проблеми при снимањето. Според него, понекогаш недостига свесност за оваа професија и во самите редакции, па оттука е потребно да се работи со раководството, како на градење капацитети за разбирање на професијата „снимател“, така и на овозможувањето подобри услови за работа.

На извршувањето на оваа професија се гледа како и на тимска работка, со новинарите, уредниците, возачите итн и, според тоа, неопходна е добра координација и усогласеност.

Дискутантите, меѓу другото, упатија апел да се изработат легитимации/пропусници за пристап до јавните институции. Од Здружението на новинарите на Македонија (ЗНМ) побараа да оствари состанок со ЈП паркинзи на општина Центар (ПОЦ) за да се обезбеди можност за паркирање блиску до локациите на настаните, за да не се губи време, што се одразува на навременото покривање на настаните.

Трајче Илиевски од ,,МРТВ”, покрај апелот за олеснување на условите за паркинг како и забрзаниот процес за вакцинирање на снимателите поради ризиците на кои се изложени, нагласи дека главната цел кон која се стремат снимателите во иднина е оваапрофесија да се третира како авторска проефсија, односно професија од која што произлегуваат авторски дела.

Присутните на настанот ја споменаа и потребата од регулирање на надоместот за работа за време на викенд, упатувајќи порака да се разгледа и можноста за бенефициран стаж за снимателската фела.

Гостинот од Србија, снимателот од јавниот сервис, Горан Копривица укажа на тоа дека слични проблеми се забележани и во Србија и во регионот, но дека Северна Македонија е прва со ваква иницијатива, односно со формирање Секција на сниматели.

Здружението на новинарите на Македонија (ЗНМ) не застанува тука со иницијативите поврзани со оваа професија. Заедно со Секцијата на снимателите ќе биде активен партнер во процесот на зголемување и унапредување на условите за работа како на новинарите така и на снимателите, бидејќи тоа е во заеднички интерес во унапредувањето на условите за работа.