Секцијата на сниматели при ЗНМ ги избра новите  координатори

Секцијата на професионални сниматели во рамките на Здружението на новинарите на Македонија одржа состанок на кој беа избрани новите координатори.

Воведно обраќање имаше директорот на ЗНМ, Драган Секуловски кој ја поздрави иницијативата за средбата и досегашната ангажираност при реализација на активностите предвидени со нејзиното формирање.

Досегашни координатори на секцијата беа Трајче Илиевски, Зоран Догов и Роберт Коцев. Пред присутните се обратија Илиевски и Догов, кои заеднички потсетија на сите обуки, тренинзи и настани во изминатите четири години кои придонесоа кон унапредување на меѓусебната соработка и соработката со колешките и колегите новинари и подобрување на релацијата со институциите.

По завршување на официјалниот дел се премина кон гласање, кое беше врз основа на предлози од страната на неколкумина колеги.

Мнозинството одлучи со кревање рака новите координатори на секцијата да бидат: Зоран Догов, Ведут Османи, Адријана Јовановска, Ристо Мишев.

Во 2019 година на иницијатива на снимателите челнови на Здружението, беше за првпат формирана со подобрување на условите за работа на снимателите, како и подобрување на соработката на снимателите со институциите. Дел од секцијата се сниматели од сите телевизии од Македонија како и од јавниот сервис.

За време на дебатата по изборот на новите координатори, беше разговарано за активностите на Секцијата на професионални сниматели за следните четири години кои ќе продолжат да придонесуваат во корист на колегите сниматели и нивната позиција во медиумскиот простор.