Ризиците од клеветата и начините за справување со неа – панел дискусија на конференцијата во Тирана 

Претставници на Здружението на новинарите на Македонија (ЗНМ) учествувaа на Меѓународната конференција што се одржува во Тирана, Албанија 01-03 март 2022 на тема ,,Промовирање на културата на толеранција и меѓусебно почитување во регионот” во организација на Фондот за Западен Балкан (WBF).  

Претставникот на ЗНМ, Билјана Настеска Каланоска во улога на панелист имаше свое излагање каде што зборуваше за тоа дали вистинската приказна може да се смета за клевета, како да се бориме против клевета, за легалните механизми за регулација на клевета и навреда во нашата земја, за намалувањето на бројот на тужби кон новинари откако законот за клевета и навреда беше декриминализиран во  2013 година.   

Настеска – Каланоска пред дваесетина претставници од повеќе меѓународни организации, фондации од повеќе земји истакна: „Вистинската информација никогаш не може да се смета за клевета доколку е секогаш проверена и точна. Втората страна во приказната е секогаш прво правило во борба против клевета. Од суштинско значење беше промената во 2013 година на Законот за клевета и навреда  кога од вкупно 330 тужби за клевети, 40 беа префрлени во граѓанска парница, а останатите престана да постојат. Последните девет години е забележан тренд на опаѓање на тужбите за клевета кон новинарите но опстојува праксата политички фигури и приврзаници на политичките партии да тужат новинари што може сериозно да влијае на слободата на изразување.“ 

Оваа конференција претставува можност на едно место претставниците од земјите на Западен Балкан и регионите да разменат искуства и да градат меѓусебно разбирање за стандардите со заеднички пристап за справување говор на омраза и клевета, особено во однос на умереноста и управувањето со содржината генерирана од корисниците и онлајн коментари за новинарската работа.  

На настанот од ЗНМ учествуваа Фиљана Кока, потпретседател на ЗНМ, Билјана Настеска – Каланоска како панелист на настанот и Милан Спировски како проектен истражувач во ЗНМ.