Регионална средба на ЗНМ со новинари и медиумски работници од Куманово
На иницијатива од колегите од регионалниот центар во Куманово со присуство на 20-тина новинари вчера се одржа средба со претставниците на ЗНМ. На средбата беше разговарано за повеќе теми кои ги засегаат колегите дописници, нивниот статус и условите во кои работат како и беа споделени искуства со кои се соочуваат секојдневно.
Претседателот на ЗНМ, Младен Чадиковски во своето поздравно обраќање истакнa: ,,Од особена важност се ваквите средби на кои можеме лично да ги споделиме предизвиците кои сите не засегаат. ЗНМ и претходно. но и во иднина ќр продолжи да ги поддржува новинарите од регионалните центри, на сите можни начини кои ќе придонесат кон професионализација на нивната работа” истакна Чадиковски.
Присутните во дискусијата укажаа на тешката економската ситуација во која што се наоѓаат регионалните и локалните медиуми и побараа од ЗНМ да почнат разговори со надлежните институции за намалување на фиксни давачки кои што ги имаат на годишно ниво. За овие медиуми од исклучително значење е да имаат повластен третман, земајќи ја нивната кревка финансиска состојба, како и да имаат намалени давачки за концесија кон регулаторот, за фреквенција кон АЕК и давачките што се поврзани со ЗАМП.
Освен ова, важно е да се размислува за системска поддршка на квалитетна медиумска содржина за што колегите од овој регион остануваат на располагање да ги споделат своите идеи во иднина. Регионалната соработка на пограничните општини е од исклучително значење за подобрување на соработката на медиумите од Кумановскиот крај заедно со медиумите од Косово Србија и Бугарија.
Координаторот на регионалниот центар во Куманово, Неџат Аќифи пред присутните колеги го истакна своето задоволство од посветеноста на ЗНМ како организација која се залага за унапредување на професионалноста на еснафот. Toj меѓу другото ги запозна присутните со проблемите со кои се соочуват новинарите и медиумските работници.
Енергетската криза секако ги засега медиумите од северо-истокот па затоа се бараат начин за помагање и на медиумите во ваква состојба пред се околу надоместокот кон АВМУ и АЕК. ,,И покрај сите проблеми и отежнатата работа на медиумите, благодарение на активностите на ЗНМ и неговиот регионален центар во Куманово, во последно време многу ме радува фактот што во овој центар се бележи задоволителен тренд на зголемување на интересот колегите да се зачленат во ЗНМ” рече пред присутните Аќифи.
На средбата во Куманово споделени беа и некои тековни проблеми како и проблемот со дописничката мрежа на МРТ, новинарите сеуште имаат месечни договори, иако МРТ вети дека тој проблем ќе биде решен. Во контекст на безбедноста на новинарите од овој регион беше споделено дека во овој момент не се забележани посериозни инциденти и нема тековни тужби од и кон новинари.
