Реализирана тродневна работилница за изработка на новиот стратешки план на ЗНМ

Здружението на новинарите на Македонија организираше работилница за стратешко планирање за следните три години (2023-2026), а во периодот кој претстои ќе бидат дефинирани и имплементирани предложените промени во стратешкиот план на Здружението.

За време на трите дена во Охрид , се разговараше за досегашните достигнувања, за идните цели и предизвици, можности, како и за слабостите, но и силните страни во организацијата. Заклучоците кои беа донесени се однесуваа на поддршката на ЗНМ во континуирано градење на капацитетите на своите членови како и досега, ангажман на регионалните центри во активностите на ЗНМ, застапување на интересите на своите членови пред домашните институции и меѓународните организации, зголемување на новинарската солидарност и соработка, како и активација на академијата за новинари, што е новитет во македонскиот новинарски простор.

На работилницата учествуваа членовите на сите органи на Здружението, односно членови на Управниот и Надзорниот одбор, Советот на честа, како и дел од координаторите на регионалните центри и координаторите на тематските секции на ЗНМ.

Стручните советници, кои се препознатливи во својата пракса како консултанти за стратешко планирање на членски организации во Македонија но и во регионот беа Наталија Братуљевиќ и Бесим Небиу. 

* Работилницата се реализираше во рамките на проектот „Заштита на слободата на изразување и независноста на медиумите како столбови на демократијата во Република Северна Македонија“финансиран од страна на Европската Унија. Ставовите и мислењата искажани на настанот не ги претставуваат официјалните ставови и мислења на Европската Унија. Одговорноста за ставовите и искажаните мислења е во целост на организаторот и учесниците.