Реакција до МИОA за штрајкот на регионални и локални медиуми
Утринава е испратен допис до Министерството за информатичко општество и администрација (МИОА) со кој се бара воспоставување на дијалог со претставниците на регионални и локални медиуми.
Во овој допис Здружението на новинарите на Македонија (ЗНМ), ја изразува својата загриженост за игнорантскиот однос кој го имаат надлежните институции кон регионалните и локалните медиуми кои веќе извесно време штрајкуваат со делумен прекин на нивната програма. Нивното изразување на протест започна со гаснење на програмата со траење од 30 минути на 26ти април оваа година, а поттикот за ваков чекор е тешката економска и егзистенцијална ситуација во која се наоѓаат веќе подолго време.
Во комуникацијата се укажува дека потребен е сериозен дијалог помеѓу МИОА и претставниците на Здружението медиум Објектив. Во спротивно се ризикува да се направи дополнителна штета на информирањето на граѓаните на теми кои се од локален јавен интерес. Исто така, уште еднаш се истакнува потребата од создавање на независен национален фонд за поддршка на квалитетни медиумски проекти од јавен интерес, констатација што претходно беше промовирана и со другите новинарски и медиумски здруженија.
Поддршка во формирањето на овој ваков механизам дадоа и претставниците на шесте регионални центри на ЗНМ на средбата одржана на 20ти април. Само преку вакви механизми би се овозможило кревање на квалитетот на програмата на локалните и регионални радиодифузери и најдиректно би се помогнало новинарството, креирањето на квалитетни медиумски содржини, а индиректно би придонело за подобрување на економската состојба на новинарите и медиумските работници.
Потсетуваме дека поради тешката економска состојба на овие медиуми во последните години се затворени 11 телевизии како и седум радија а отворен е само еден нов радиодифузер.
