Продолжува процесот на градење на капацитетите на медиумските работници од МРТ

Изминативе три дена група од над 20тина новинари и сниматели од програмските сервиси на МТВ, и од Македонското радио учествуваа на тридневна обука во Охрид за кревање на стандардите во известувањето и работењето, како и во битката против дезинформациите.

Практични примери и корисни совети во насока на градење на капацитетите на новинарите и медиумските работници од јавниот сервис споделија обучувачите Ана Зафирова и Сефер Тахири, а на обуката учество имаше и претседателот на ЗНМ, Младен Чадиковски.

Свои впечатоци од обуката сподели новинарката Соња Рилковска која истакна: ,, Oвие работилници, обуки, тренинзи кои ЗНМ од минатата година ги организира за вработените во Мрт се од исклучително значење за унапредување на нашите знаења и вештини во создавање на поквалитетни и реативни медиумски содржини на јавниот сервис. Со овие предавања ние како новинари се доближуваме до новите трендови на новинарско известување.”

На обуката беа обработени актуелни теми од областа на новинарскиот живот, раскажување приказни, креирање „сториборд“ и параграф преку секвенци, како да се креираат подкасти, беше обработена и темата за подготовка и развивање на истражувачка сторија, но се разговараше и за начинот за справување со дезинформации. Воедно беа опфатени и специфични теми кои се однесуваат поконкретно на работата на редакциите во рамките на МРТВ.

Во контекст на потребата од обука и релевантноста на темите кои беа опфатени од страна на предавачите, изминативе три дена новинарката Фиторе Демоли потенцираше дека: ,,Од оваа обука научив многу работи за новинарството, почувајќи од пристапот што треба да да се даде во еден прилог, од ефектот што треба да го има прилогот во јавноста, кои се критериумите што се бараат во содржината на една информација за да биде комплетирана. Ми беше чест што бев дел од оваа обука и сметам ека вакви настани треба да има повеќе, бидејќи сите учесници колеги новинари и медиумски работници имаат бенефит.”

Учесниците на обуката новинари, сниматели и уредници со своето активно и креативно учество дадоа дополнителен импулс на целиот настан и заедно се согласија дека ваков формат на настани се од исклучително значење за јакнење на новинарскиот дух и самостојноста на редакциите и дека и во наредниот период  тие ќе продолжат.

Со ваков тип на настани и поддршката на ЗНМ, јавниот сервис во иднина ќе обезбеди континуитет во процесот на кревање на новинарските и уредувачките стандарди и политики. Проектот за медиумска писменост „Младите размислуваат”, во чии рамки се одржа овој настан, е петгодишен проект финансиран од УСАИД и имплементиран од ИРЕКС, и оваа обука е дел од активностите кои произлегуваат од потпишаниот меморандум за соработка помеѓу ЗНМ и МРТВ.