Пријава до МВР за попречување во работа на снимател од М Нет ТВ во Штип

Во текот на вчерашниот ден новинарска екипа на М Нет ТВ беа попречени на терен и беа спречени да ги извршуваат работните задачи, односно да снимаат сообраќајна несреќа во близина на Штип, кај населба Стар Караорман од страна на физичко лице – учесник во сообраќајната незгода.

ЗНМ стапи во директен контакт со вработените од медиумот М Нет ТВ каде ни укажаа дека биле приморани да повикаат полиција, службениците беа исклучително брзи и коректни, лицето беше отстрането и нивната работа била овозможена. За овој случај колегите имаат поднесено пријава до МВР.  

Ваквиот однос кон новинарите и снимателите кои се на работна задача на терен е неприфатлив и потребно е да биде санкциониран од страна на Министерството за внатрешни работи затоа што насилството кон медиумските работници е неприфатливо во демократски земји.

Потсетуваме дека доколку ваквите инциденти се толерираат во иднина има ризик да се охрабрат нови посериозни насилства кон новинарите, а со тоа дополнително да се загрози нивната безбедност, правото на слобода на изразување, како и правото на информирање на граѓаните.

Од страна на ЗНМ беше понудена бесплатна правна помош и случајот ќе биде следен како и мерките кои се очекува МВР да ги превземе.