Претставници на Регионалниот центар на ЗНМ од Тетово на средба во МВР

Подобрување на соработката со локалната полиција, изнаоѓање начини како да се унапреди и одржува комуникацијата помеѓу новинарите и снимателите од тетовскиот регион и полицијата, беа главните теми на работниот состанок кој денеска се одржа во МВР во Скопје

Координаторот на регионалниот центар од Тетово при ЗНМ Сенат Зулбеари, Урим Хасипи и координаторот на секцијата на сниматели од полошкиот регион Ведут Османи заедно со  Претседателот на ЗНМ Младен Чадиковски и директорот на ЗНМ, Драган Секуловски одржаа средба со Тони Ангеловски, помошник министер за односи со јавност при Министерството за внатрешни работи.

Претседателот Чадиковски ја истакна досегашната позитивна соработка меѓу ЗНМ и МВР и потенцираше дека со почести средби и прецизно укажување на проблемите во иднина можеме да најдеме решение.

 ,,Фактот дека има повремени поплаки од новинари на односот на дел од помладите претставници во полицијата, покажува дека е потребен континуиран процес на градење на капацитетите и на полицијата, но и на новинарите и медиумските работници во насока на унапредување на меѓусебната комуникација и соработка генерално” – рече Чадиковски.   

На средбата беа истакнати тековните предизвици со кои се соочуваат колегите новинари и сниматели од Тетовскиот регион со конкретни примери, а се разговараше и за конструктивни решенија за надминување на истите. Исто така тема на дискусија беше подобрувањето и олеснувањето на условите за работа на новинарите и снимателите при покривање на настани организирани во тетовскиот регион, посебно за настани кои подразбираат официјални посети на градот Тетово во кои има посебни протоколи за обезбедување.

Ангеловски најави дека во текот на наредниот период ќе се организира средба со раководството на СВР Тетово каде ќе бидат поканети сите засегнати медиумски работници. На средбата ќе се разговара отворено за сите аспекти поврзани со комуникацијата и соработката меѓу полицијата и новинарите од овој регион.

На состанокот Чадиковски исто така го потенцираше и проблемот кој новинарите од Велес го имаат со повремената недостапност за новинарите на портпаролот на СВР Велес. Беше укажано дека постои свесност за ова и дека се работи на тоа да се подобри транспарентноста и отвореноста на полицијата кон новинарите во Велес.