Почина колегата Исуф Кадриу

Здружението на новинарите на Македонија (ЗНМ) изразува длабоко жалење за загубата на новинарот Исуф Кадриу и сочувство до семејството и пријателите.

Исуф Кадриу почина на 52-годишна возраст од срцев удар.

Кариерата на колегата Кадриу започнува во 1998 година во телевизијата ЕРА, а од 1999 година во Програмата на албански јазик на Македонската телевизија, каде работеше како уредник на вести до 2008 година, вклучително и чувствителниот период на конфликтот во 2001 година, каде со посветеност, не штедејќи ништо од професионален аспект придонесе за правично и објективно информирање за случувањата на терен, а честопати и самиот беше во улога на воен известувач од фронотот.  Од 2008 година е заменик главен одговорен уредник на телевизијата АЛСАТ, каде што даде огромен придонес во процесот на организирање и водење на работата во информативната програма на телевизијата. Колегата Исуф Кадриу во телвизијата АЛСАТ, но и меѓу новинарите генерално, токму заради својата професионалност и посветеност остави трага и пример како треба да се работи оваа професија.

Од 2001 година Кадриу беше постојан дописник на Радио Слободна Европа од Скопје од каде известуваше за политички, економски, културни случувања и настани од Скопје и земјава.

Исуф Кадриу со години активно придонесуваше во работата на ЗНМ како активен член и исто така беше член во првиот Управен Одбор на Советот за етика во медиумите на Македонија на предлог на ЗНМ.

Фотографија: АЛСАТ