Потпишан меморандум за соработка помеѓу ЗНМ и Судско-медиумскиот совет

Во Кривичниот суд во Скопје вчера се одржа работна средба на која присуствуваа претставниците на Здружението на новинарите на Македонија (ЗНМ), членови на Судско-медиумскиот совет, судии од Кривичниот, Граѓанскиот, Апелациониот и Уставниот суд во Скопје, претставници на Мисијата на ОБСЕ во Скопје, Совет на Европа -Програмската канцеларија во Скопје и Коалиција Сите за правично судење. 

За време на средбата, претседателот на ЗНМ, Младен Чадиковски и претседателот на Судско-медиумскиот совет, Васко Маглешов потпишаа меморандум за соработка помеѓу двете организации.

 Воведно обраќање имаше претседателот на ЗНМ, Младен Чадиковски кој изјави:  

„ За нас постапките со кои се третираат теми кои се важни за работата на новинарите и општо за слободата на изразување важно е да не отстапуваат од позитивната пракса на судот во Стразбур. Затоа ЗНМ и во минатото организираше и учествуваше во работилници за новинари и судии како и за обвинители со што сакавме да покажеме дека можеме заедно да комуницираме на теми кои ни се од интерес и дека знаеме која е црвената линија кога ќе се злоупотреби слободата на изразување и со тоа се повредува друго човеково право. Во оваа насока, на судиите сигурно им е познат механизмот на примена на трипартитниот тест. механизам кој се користи во судот за човекови права во Стразбур и е важен не само за судиите туку и за новинарите, при неговата практичната примена, најпрвин се испитува дали ограничување на слободата на изразување е пропишано со закон, потоа дали е насочено кон остварување на легитимна цел, па финално, дали е „неопходно во едно демократско општество“.

Настанот беше поздравен и од претседателот на Основниот кривичен суд Скопје, Иван Џолев кој рече: 

„Лично за мене, учеството во Судско-медиумскиот придонесе промена во начинот на кој ги доживувам медиумите. Сметам дека ова телото ни беше навистина потребно. Во изминатите неколку години направени многу исчекори,  во насока на тоа како треба да изгледа релацијата помеѓу новинарите и судиите. Под влијание на Судско-медиумскиот совет, направена и стратегијата за транспарентност во Кривичниот суд, која што е објавена на нашиот сајт и други активности кои постојано ја подобруваат меѓусебната комуникација.“ 

Васко Маглешов, претседателот на Судско-медиумскиот совет во својот говор се наврати на почетоците на соработката со Кривичниот суд и рече:  

„Би сакал да приложам неколку детали во врска тоа како нашата историја почна, во смисла на соработка, што се поминавме и што имаме идеја да поминеме во иднина. Во основа идејата е добра со позитивен дух да соработуваме повеќе, да се почитуваме повеќе и се разбира да ја информираме јавноста повеќе за информации битни за неа.“ 

По завршувањето на воведните обраќања и потпишувањето на меморандумот, следеше дебата од страна на присутните претставници на институциите и организациите во насока на  подобрување на соработката со судските и медиумските органи преку заеднички активности, консултации и кампањи. Беа споделени досегашните искуства меѓу новинарите од различни медиуми во земјава што редовно известуваат за работата на судовите како и искуствата на судските власти од медиумските известувања за судските процеси, а сето тоа во полза пред се на јавниот интерес, но и на професионалното новинарство и независноста на судиите. 

Настанот е организиран во рамките на проектот „Зајакнување на слободата на медиумите во Северна Македонија“ финансиран од Кралството Холандија и имплементиран од страна на холандскиот Хелсиншки комитет и Фри прес анлимитед (Free Press Unlimited) во партнерство со Здружението на новинарите на Македонија. Ставовите и  мислењата на учесниците на настанот нужно не ги претставуваат ставовите на Кралството Холандија, ниту на организациите што го спроведуваат проектот или на нивниот локален партнер