Потпишана декларација за соработка помеѓу ЗНМ и СЕММ и Здружението за интерактивно огласување ИАБ Македонија (ИАБ)

Потписниците на Меморандумот за соработка, во рамки на својата примарна дејност и цели, заеднички ќе дејствуваат и во корист на дополнително унапредување на работата на новинарите, медиумите, издавачите, маркетинг агенциите, како и подобрување на стандардите на дигиталното огласување на територијата на Република Северна Македонија. Преку заеднички активности, трите здруженија, меѓу другото, ќе се стремат и кон континуирана промоција и унапредување на етичките стандарди како и иницијативи за градење на капацитетите на своите членови.

Според претседателот на Здружението на новинарите на Македонија (ЗНМ) Младен Чадиковски со оваа, заедничка, иницијатива, „ќе се унапреди промоцијата и развојот на Регистарот на професионални онлајн медиуми и дополнително ќе се засили медиумската саморегулација како механизам за промоција на медиумите кои ги почитуваат професионалните и етичките стандарди при известувањето“.

Претседателката на Управниот одбор на Советот за етика во медиумите во Македонија (СЕММ),  Катерина Синадиновска, го истакна значењето на заедничката иницијатива меѓу СЕММ, ЗНМ и Стопанска комора, како и можноста, во рамки на внатрешната координација во ИАБ, да се поттикне процесот на пристапување на поединечни информативни онлајн медиуми кон Регистарот на професионални онлајн медиуми. ,,Во иднина, ЗНМ и СЕММ ќе работат на конкретни, заеднички активности за членките, во насока на промоција на етичките стандарди, заедничките обуки, унапредувања на етичките правила за известување и сл.“ , изјави Синадиновска. Претседателката на Здружението за интерактивно огласување ИАБ Македонија (ИАБ), Сашка Николова најави дека ,,во иднина ќе се унапредува понатамошната соработка во насока на подобрување на дигиталното издаваштво, промоција на етички стандарди, како и развој на дигиталниот пазар и огласувањето во Македонија”.