Повик за поддршка за изработка на стручни авторски текстови на тема: „Транспарентноста на институциите на власта (на национално ниво и општинско ниво) и пристапот до информации од јавен карактер поврзано со професионалната работата на новинарите – Помеѓу теорија и пракса“

Во рамките на проектот „Заштита на слободата на изразување и независноста на медиумите како столбови на демократијата во Република Северна Македонија“ (Safeguarding the freedom of expression and independence of media as pillars of democracy in the Republic of North Macedonia), финансиран од страна на Европската Унија, а во реализација на Здружението на новинари на Македонија (ЗНМ), отворен е повик за поддршка на автори за изработка на четири стручни авторски текстови на теми поврзани со состојбата и предизвиците кои ги засегаат новинарите а се однесуваат на транспарентноста на владините и јавните институции , како на државно така и на општинско ниво, и за навремено доставување информации од јавен интерес до медиумите.  

Цел на повикот

Една од клучните теми посочена како сериозен предизвик за новинарите и медиумските работници е транспарентноста на владините и јавните институции, како на државно (национално) така и на општинско (локално) ниво, особено кога се работи за навремено доставување информации од јавен интерес до медиумите –  тренд кој повторно се појави за време на пандемијата и е сериозен предизвик за истражувачките новинари, но и за сите останати кои за своето дневно известување на јавноста ги користат механизмите за слободен пристап до информации.

Овој конкурс е со цел да се зголеми видливоста и да се истакнат предизвиците со кои се соочуваат новинарите и медиумските работници при нивната работа (исто така ставајќи го фокусот на родово чувствителните прашања), кога станува збор за отвореноста и достапноста на институциите да овозможат пристап до информации од јавен карактер (и од важност за јавниот интерес) , вклучително за посеопфатно покривање на примери за (не)реакциите на соодветните институции што треба да го спроведуваат законот за слободен пристап до информации од јавен карактер,   причините за отсуството на транспарентност (дали тоа го дозволуваат пропустите на постојните законски решенија, или е резултат на индивидуални толкувања), (не)познавањето на постапките за пристап до информации од јавен карактер од страна на барателите на информации (во случајот новинарите), и слично.

Кој може да аплицира на повикот?

На конкурсот може да аплицираат сите новинари од државата без оглед на тоа дали во моментот имаат или не ангажман во медиум. Освен новинари, на конкурсот може да аплицираат и лица кои имаат познавања и искуство од правната регулатива како и пракса во контекст на слободниот пристап до информации од јавен карактер (и од важност за јавниот интерес).

Услови

Сите текстови треба да бидат изработени според највисоките професионални и етички стандарди и почитување на кодексот на новинарите.  Финалниот текст треба да биде помеѓу 1.500 и 2.000 зборови. Во рамки на текстот потребно е да се користат исклучиво авторски фотографии

Начин и рок на аплицирање

Заинтересираните новинари треба да го пополнат формуларот (симнете тука) во кој ќе ја образложат својата идеја и да го испратат на contact@znm.org.mk и bnasteska@znm.org.mk со назнака „Апликација по повик IPA/2022/440-473-AJM – 009“.  Крајниот рок за аплицирање е 31 мај 2024, до 24 часот ЦЕВ.

Избор

Изборот на лицата кои ќе бидат поддржани ќе го направи тричлена комисија составена од претставници на ЗНМ. Насоките на истражувањето и спецификите на темата која ќе се обработува ќе бидат утврдени во координација со ЗНМ.  

Фонд

Фондот за надомест по авторски труд изнесува 30.000 денари бруто.

Референтен број: IPA/2022/440-473-AJM – 009 Наслов на проектот: „Заштита на слободата на изразување и независноста на медиумите како столбови на демократијата во Република Северна Македонија“ (Safeguarding the freedom of expression and independence of media as pillars of democracy in the Republic of North Macedonia) Лот: 5.8.1 – Тематски стории  (A2.3.2)