Одржано годишно неизборно собрание на ЗНМ

Здружението на новинарите на Македонија (ЗНМ) во саботата, на 7-ми мај го одржа годишното неизборно собрание на кое што присуствуваа редовните членови на здружението.

Воведно обраќање имаше претседателот на ЗНМ, Младен Чадиковски кој нагласи дека и покрај тешките пандемски услови во 2021 година, здружението успеа да обезбеди поддршка за реализација на повеќе проекти, обуки и настани и средби со вклученост на над 400 учесници.

„2021 беше уште година на предизвици. Во отежнати услови за работа и здравствена криза поради пандемијата со Ковид 19 на светско ниво, но и дома, кај нас,  ЗНМ успеа да опстои на своите определби зацртани во Стратешкиот план од 2019 година и да продолжи да работи на неговата реализација“, рече Чадиковски.

Чадиковски ја истакна активноста на секциите на ЗНМ, напорите за промена на Кривичниот законик кои се уште се во собраниска процедура, заложбите на ЗНМ за намалување на неказнивоста на извршителите на напади врз новинарите и прекршувањето на нивните права: „Во 2021 во рамките на ЗНМ активно работеа секциите на новинари посебно  Секцијата на сниматели  која во текот на минатата година реализираше неколку регионални средби посветени за подобување на меѓусебната соработка и солидарно функционирање. Позитивен исчекор кој што за здружението е важен на долг рок е оформувањето Секцијата на млади новинари во рамките на ЗНМ. Членовите на оваа секција веќе активно работат на својот стратешки план за дејствување во иднина. Како резултат на упорните барања на ЗНМ, Владата на Северна Македонија ги прифати предложените измени на Кривичниот законик, кои се во согласност со препораките на Советот на Европа, а со цел да се воспостави поефикасен систем за заштита на новинарите, притоа обесхрабрувајќи ги потенцијални напаѓачи во иднина“.“ 

Сашка Цветковска која што е координатор на секцијата за млади новинари, во однос на можностите и потенцијалите на младите колеги рече: „Да се користат младите во продукцијата на новинарски продукти е едно, но најголемата можност за поттикнување промени преку новинарството денес лежи во глобалната поврзаност: да се подготви следната генерација граѓани на светот кои ќе имаат вештини, разбирање и храброст да ги решат глобалните проблеми на денешницата во нивното време. За тоа да се случи, потребно е поголемо вклучување на младите во редакциите, но особено е важно на истите да им се дадат клучните вештини и да им се обезбеди средина во која што ќе се развиваат“.

На собранието се разговараше на неколку важни теми меѓу кои измена и дополнување на правилници и Статут на ЗНМ за вклучување на претставници од регионалните центри на ЗНМ во Управниот одбор на ЗНМ, дефинирање на цели на секција на млади новинари при ЗНМ и дебата околу тешките економски услови во кои се наоѓаат медиумите пред се регионалните и локалните медиуми. Извршниот директор на ЗНМ, Драган Секуловски се осврна на наративниот извештај за 2021 година, односно реализацијата на активностите за минатата година, а беше опфатен и финансискиот односно ревизорскиот извештај на Здружението.

На настаното, Милан Спировски, проектен истражувач во ЗНМ, го презентираше и извештајот за „Индикатори за слободата на изразување и независноста на медиумите во Македонија за 2021 година“, во кој се елаборирани новите трендови за состојбата на слободата на медиумите и безбедноста на новинарите и спроведувањето на постојното национално законодавство поврзано со медиумите во земјава.