ОДГОВОР НА ПРЕТСТАВКА ПОДНЕСЕНА ВО ИМЕ НА КАТЕРИНА ГЛИГОРОВА ОД ОПОЛНОМОШТЕНИОТ АДВОКАТ ГОРАН АНДРЕВСКИ

Советот на честа на ЗНМ и покрај тоа што не е статутарно обврзан, ја рагледа претставката поднесена од адвокат Горан Андревски, во име на својот клиент Катерина Глигорова – член на УО на АД МЕПСО, во која се реагира на написи во повеќе медиуми, во кои според  претставката се нарушил принципот на пресумпција на невиност, бил прекршен и законот за заштита на лични податоци, како и Кодексот на ЗНМ. Притоа се бара демант и бришење на текстовите.  Откако ги разгледа пишувањата во медиумите за клиентот на адвокатот Андревски, Советот на честа на ЗНМ заклучи дека нема прекршување на Кодексот на ЗНМ.

ОБРАЗЛОЖЕНИЕ

Во посочените написи осомниченото лице е наведено со иницијали, иако е наведна функцијата на поранешниот член на УО на АД МЕПСО, како и сумата со која е оштетена  компанијата. Притоа во написите никаде не се тврди дека лицето КГ е виновно, туку се цитираат наводи од кривичната пријава и се објавуваат информации од Финансиската полиција, што е вообичаено за известување за таков настан. Токму во таа насока е и користењето на ел-формата, бидејќи во спротивно би бил нарушен принципот на пресумпција на невиност. Советот на честа нема право да бара деманти и бришење на текстови, зашто не е тоа во негова надлежност. Тоа може да го побара само подносителот на претставката, односно личноста што смета дека со новинарски напис и се повредени човекови и уставни права, како и дека и е нанесена штета на угледот. Советот на  честа на ЗНМ постапува по претставка за текст, односно содржина објавена од конкретен новинар, не од медиум и секогаш го осудува тенденциозното, непрофесионално и некоректно пишување на новинари без оглед дали се членови на ЗНМ или не. На ова, меѓу другото, се должи и доцнењето со одговорот на претставката, за што Советот на честа, сепак, се извинува.