Одговор на претставката на Ана Василевска за текстовите објавени во Мкд.мк и Сдк.мк

Советот на честа ги разгледа двете идентични претставки од Ана Василевска-новинар во Макфакс и А1он кои се однесуваат на текстови објавени кон крајот на јули 2020 година во порталите МКД.МК и СДК.МК од новинарите А.Д. и Биљана Несторовска во врска со Агенцијата за филм и одлуката на Антикорупциската комисија да постапува во рамките на нејзините надлежности.  

Василевска реагира на спомнувањето на нејзиното име во тие текстови без да биде контактирана како втора страна и без да се објави демант, со што смета дека е нанесена штета на нејзиниот професионален  углед. Имено, во посочените текстови, за Василевска стои дека има конфликт на интереси како член на Советот на Агенцијата за филм и рецензент истовремено. Со претставките е приложен и Извештај од инспекцискиот надзор  кој ги негира наводите за постоење конфликт на интереси.

Врз основа на приложените докази Советот на честа е на став дека има прекршување на Кодексот на ЗНМ во членовите 1 и 3 со кои се наложува проверка на информацијата и настојување на новинарот за објавување деманти.

1. Новинарот има право на слободен пристап до сите извори на информирање што се од јавен интерес. Новинарот треба да објавува точни, проверени информации и нема да прикрива суштински податоци и да фалсификува документи. Доколку информацијата не може да се потврди, или станува збор за претпоставка, односно шпекулација, тоа треба да се каже и да се објави. Точноста на информацијата треба да се провери колку што е тоа можно.

3. Новинарот ќе настојува да биде обезбедено објавување на исправка, демант и одговор во случај кога ќе биде утврдена неточност на информацијата.

Точно е дека медиумите го објавиле ставот на директорот на Агенцијата Тозија, но не побарале став и од Василевска, чие име се спомнува во текстовите. Советот на честа им препорачува на колегите новинари, без оглед дали се членови на ЗНМ или не, во своите написи, особено кога станува збор за конфликт на интереси или за информации врзани за финансии, да користат прецизни термини, бидејќи во конкретниов случај не станува збор за конфликт на интереси, туку за преклопување, или во краен случај неспојливост на ангажмани  на субјект од облигациониот договор.

Исто така, Советот на честа на ЗНМ и препорачува на Ана Василевска да испрати личен демант до посочените портали, бидејќи Кодексот ја предвидува оваа обврска за медиумите.