Како против странската пропаганда во медиумите – обуки за медиумски работници 

Изминатите неколку дена во рамките на активностите кои се дел од проектот „Спротивставување на странската пропаганда и дезинформации преку јакнење на капацитетите на медиумите и новинарите“ се одржа обука со триесетина новинари и медиумски работници. Обуката беше реализирана помеѓу Здружението на новинарите на Македонија (ЗНМ), ЕСТИМА и Амбасадата на САД во Скопје. 

На темата свои излагања имаа Максим Саморуков кој е европски експерт за руска пропаганда и поранешен руски новинар и Ана Крстиновска која е експерт за односите меѓу Кина, ЕУ и Западен Балкан. 

Во последниве години, Македонија се најде на крстопатот на конкурентните геополитички влијанија, особено од Русија и Кина. Русија, која историски има силни културни и историски врски со регионот, се обиде да го задржи своето влијание во Северна Македонија преку дипломатски канали и економски ангажмани. Додека кинеското присуство е првенствено економско, тоа има потенцијал да влијае на геополитичкиот пејзаж, обезбедувајќи си зголемена моќ во регионот. Додека земјава се движи низ оваа сложена мрежа на различно влијание, таа мора внимателно да ги балансира односите и со Русија и со Кина, истовремено земајќи ги предвид импликациите од таквите ангажмани врз нејзината долгорочна политичка и економска стабилност. 

За време на обуките, фокусот беше задржан и на специфичностите, разликите и синергиите меѓу кинескиот и рускиот пристап во македонски контекст. Во рамките на ова беше одржана и работилница на која задачата беше да се открие без помош на интернет, за каква пропаганда станува збор, дали има кинески и руски дезинформации во текстовите.  

Поточно, учесниците требаше да наведат извор од каде што мислат дека е дадена информацијата, клучни поенти на текстот, таргет публика, дали препознаваат дезинформации, полувистинити и затаени информации. 

По завршување на вежбата, новинарите учесници заедно со предавачите развија дискусија каде што тема беше токму руското влијание, колку е тоа присутно во земјава и во регионот, споделувајќи лични ставови и видувања.  

Од страна на обучувачите беа споделени разликите помеѓу кинеската и руската пропаганда каде што беше истакнато следново: кинеската пропаганда има долга традиција на делување во рамките на земјата, но се уште екстерно делување е во процес на учење, ширење на позитивна перцепција за вестите од Кина и критичката цензура. Што се однесува до руската пропаганда, меѓу другото беше кажано дека тука карактеристично е тоа што има долга традиција на научен пристап во врска со ширење на дезинформации и лажни вести за опонентот, вмешување во внатрешните работи на други земји, како и поддршка од разузнавачките служби. 

Ваквите обуки се наменети за новинари кои секојдневно известуваат на теми од дома и светот, од традиционалните и онлајн медиумите кои користат интернет канали за комуникација. Целта беше да се добие дополнително знаење за препознавање на надворешно влијание и одбегнување на истото при презентација на вестите пред јавноста. Во претстојниот период учениците ќе бидат поканети да работат на колаборативни медиумски продукти на темата, а резултатите ќе бидат објавени наскорo.