Иницијатива за соработка помеѓу Собранието и ЗНМ

На предлог на ЗНМ вчера во просториите на Собранието на Северна Македонија се одржа средба на која присуствуваа претседателот Талат Џафери, претседателот на ЗНМ Младен Чадиковски и извршниот директор Драган Секуловски.

На работната средба беше разговарано за можноста да се организираат настани оваа есен на кои ќе бидат поканети група на пратеници и новинари. Целта на овие активности е да се разговара за подобрување на транспарентноста за работата на собранието кон новинарите и медиумите, како и да се сумираат впечатоците од периодот на работата на собранието со новинарите и медиумите во услови на криза предизвикана од тековната пандемија.

На средбата претседателот Џафери и претседателот Чадиковски дополнително разговараа и за можноста да се организира регионална конференција во Скопје со вклученост на пратеници на собранијата од Босна и Херцеговина, Црна Гора и Србија како и новинари од здруженијата од овие земји со идеја да се поттикне регионална соработка помеѓу пратениците и новинарите.

Освен ова беше споделена можноста за потпишување на заедничка декларација од собранијата од овие земји со заложба за подобрување на законските решенија во контекст на унапредување на безбедноста на новинарите.