Ефикасно имплементирање на законите за подобра безбедност на новинарите е една од темите кои беше разговарано на денешната работна средба со Министерот Бојан Маричиќ а во организација на Здружението на новинарите на Македонија (ЗНМ).

Измените и дополните на Кривичниот закон со кој се овозможува системска заштита на новинарите во случај на повреда на нивните права како и Законот за граѓанска одговорност од клевета и навреда во кој е намалена нематеријалната штета за новинарите се веќе во собраниска процедура и се очекува во наредниот период да бидат усвоени.

Претседателот на ЗНМ, Младен Чадиковски на средбата укажа дека нашата земја има бројни обврски кои треба да се исполнат со цел да се подобрат правата на медиумските работници. Тие обврски се предвидени во Препорака на Советот на Европа CM/Rec(2016)4 за заштита на новинарството и безбедност на новинарите и другите медиумски актери како и во новите препораки на Европската комисија од 16ти септември 2021 година за подобрување на положбата и безбедноста на новинарите во ЕУ.

На средбата беше договорено во наредните недели Министерството за правда да иницира координација помеѓу ЗНМ и партнерските медиумски организации заедно со претставници на обвинителството, граѓанскиот и кривичниот суд но и Академијата за обука на судии и јавни обвинители. Целта на оваа координација е да се отпочне со повеќе секторска соработка во насока на поефикасна имплементација на новите измени во Кривичниот закон за заштита на медиумските работници како и на препораките на Советот на Европа и Европската комисија.