ЗНМ: Секцијата на фоторепортери побара на владините фотографии да стои воден жиг

Секцијата на фоторепортери при ЗНМ заедно со претставниците од извршната канцеларија остварија средба со претставници од секторот за комуникации на Претседателот на Владата на Република Северна Македонија на која се дискутираше за проблемите со кои се сочуваат фоторепортерите при покривање на настан од јавен интерес.

За време на настани во организација на Владата или другите јавни институции, има примери каде предност се дава на државни службеници кои ги документираат настаните на сметка на претставниците од приватните медиуми. Оваа пракса е дискриминирачка и претставува нелојална конкуренција на медиумските работници, а на тој начин граѓаните не секогаш можат да добијат реална слика за случувањата, бидејќи се претставува само една страна од приказната која може да биде пристрасна.

Присутните фоторепортери, членови на секцијата, Борис Грданоски, Ѓорѓи Личовски, Петр Стојановски споделија дел од проблемите со кои се соочуваат  како фоторепортери за време на настаните во организација на јавните институции, како на пример: повремено попречување од страна на службеници за време на известување / фотографирање, предност во позициите на „владините фоторепортери“, можноста за бесплатно преземање на обемен, необележан (без воден жиг) фото материјал на Владата и останатите институциите од страна на медиумите

Ана Андреева, секретар за комуникации, односи со јавност и протокол на Претседателот на Владата на РСМ, посочи дека моменталниот комуникациски систем е правен со поддршка на британската амбасада но и дека во блиска измена се најавени измени околу протоколите.

Директорот на ЗНМ, Драган Секуловски во своето адресирање во врска со наведените проблеми кажа дека ЗНМ бара да бидат земени во предвид измените на правилата за присуство на медиумските работници согласно нивните потреби со цел непречено документирање и известување на настани од јавен интерес.

Посочување на контакт лице кое ќе биде одговорно за секој јавен настан со кое медиумските работници ќе можат да сугерираат идеи и комуницираат е од особено значење. Втора важна работа е имплементирање на водениот жиг на владините фотографии и видеа со цел да се заштити авторското право на фоторепортерите но и да биде свесна публиката кога станува збор за владин или материјал креиран од државен службеник а кога е тоа фотографија или видео од фоторепортер или снимател кој работи во приватен медиум или агенција.

На овој начин и граѓаните дополнително би се заштитиле од пристрасни информации, а медиумите би имале своја содржина во која автори ќе бидат медиумски работници, а не службеници од јавни установи.