ЗНМ: Прекршување на препораките на ДИК во контекст на попречување на работата на новинарите

Здружението на новинарите на Македонија (ЗНМ) ќе достави претставка за попречување на работата на новинарката Антонија Јаневска од новинската агенција Мета.мк до Државната изборна комисија (ДИК).

Претставката се однесува за непрофесионален однос на претседателот од избирачкиот одбор на избирачко место бр.2648 во градинката Пролет, населба Влае во Скопје каде колешката Јаневска била спречена во извршување на својата професионална новинарска работа.

Според пријавата од колешката Јаневска до ЗНМ, и покрај што таа уредно се претставила, ја покажала својата акредитација и напоменала дека не фотографира ниту гласачки материјал ниту гласачи, претседателката на избирачкиот одбор во гласачкото место бр.2648 не и дозволила да фотографира во просторијата каде што се одвивало гласањето. 

Овој случај денеска е прекршување на препораката на ДИК дека новинарите, снимателите и фоторепортерите во рамките на вршење на својата професионална работа можат слободно да одат во избирачките места и да снимаат и фотографираат со единствено укажување да се внимава на тајноста на личните податоци на граѓаните.

И покрај укажувањето на ДИК дека треба да се овозможи на новинарите кои уредно се легитимирале пред избирачкиот одбор, непречено да ја остварат својата професионална работа, ЗНМ ќе побара одговорност за претседателката на избирачкиот одбор која ја попречила новинарката Јаневска во вршењето на нејзината професионална работа и ќе побара санкција.