ЗНМ: Осудителна пресуда за напаѓачот на снимателот Иван Камчев од 24ТВ
Здружението на новинарите на Македонија (ЗНМ) ја поздравува осудителната пресуда донесена од страна на Основниот суд во Кавадарци на 03.11.2023 каде обвинетиот Љ. Р. е прогласен за виновен за извршено кривично дело, спречување на службено лице во вршење на службено дејствие по член 382 став 3 од новиот изменет Кривичен законик.
Конкретно, оваа судска пресуда следи по пријавата од страна на снимателот на 24ТВ на 18.07.2023 дека на излезот од Росоман на регионалниот пат Градско-Прилеп, обвинетиот Љ. Р. упатувајќи навреди и употребувајќи сила ги спречил во вршење на службено дејствие да снимат прилог за сообраќајна незгода.
Основниот суд во Кавадарци постапувајќи по поднесен обвинителен предлог од страна на јавниот обвинител во Кавадарци на 02.10.2023 за обвинетото лице Љ. Р. за стореното погоре наведено кривично дело го осуди на условна осуда со која му утврди казна затвор во траење од четири месеци, која казна нема да се изврши доколку обвинетиот во временски период од една година по правосилноста на пресудата не стори ново кривично дело.
ЗНМ ја поздравува брзата и ефикасна постапка како од обвинителството така и од судот во Кавадарци каде со примената на новите одредби од кривичниот законик е санкциониран нападот кон новинари и медиумски работници додека ја својата вршат професионална работа.
Оваа пресуда е од особена важност заради тоа што има за цел во иднина да се воспостави позитивна судска пракса со доследна примена на овие измени со цел конечно правосудните органи да имаат проактивен пристап при заштита на правата на новинарите.
Само преку функционален систем за заштита на новинарите се очекува дека во иднина ќе се демотивираат напаѓачите да се закануваат и да напаѓаат, а на тој начин да се осигура безбедна средина како основен предуслов за работата на новинарите и медиумските работници во земјава.
