ЗНМ на работилница во Брисел за правење глобална методологија против странско штетно информациско влијание (FIMI)

Претседателот на Советот на честа при ЗНМ, Огнен Јанески, учествуваше на меѓународната работилница за справување со странска информациска манипулација и мешање во изборните процеси

Огнен Јанески, претседателот на Советот на честа при Здружението на новинари на Македонија (ЗНМ), учествуваше на значајна работилница за развој на глобална Методологија за справување со странската информациска манипулација и мешање во изборните процеси (FIMI – Foreign Information Manipulation and Interference). Работилницата беше организирана од меѓународната ИДЕА, и собра експерти кои ќе ги адресираат предизвиците кои ги носат овие закани (особено кон изборните процеси) и за да развие ефективни стратегии за нивно надминување.

На настанот се работеше на создавањето сеопфатна рамка која ќе ги поддржи граѓанските организации во препознавањето и во анализата на факторите и поттикнувачите кои овозможуваат FIMI. Оваа методологија ќе ги зајакне капацитетите на ГО, а и на медиумите, да ги препознаваат социо-политичките и економските фактори кои овозможуваат манипулации и ќе им овозможи алатки за застапување за ефективни политики.

Јанески во овој контекст, посочи на клучната улога на медиумите во намалувањето или засилувањето на ризиците поврзани со FIMI. Потенцирајќи го македонското и балканската искуство, Јанески ги истакна предизвиците со кои се соочуваат новинарите во борбата против дезинформациите и нагласи колку е важно да се зајакнат медиумската писменост, регулаторните рамки и притисоците врз новинарите, како и да се земат предвид ехо-коморите на социјалните мрежи, влијанието на брзонапредувачката технологија, наспроти нискиот степен на дигиталната писменост.

„Растот на FIMI претставува директна закана за демократијата. Клучно е да останеме посветени на фактичкото известување и етичките стандарди, додека соработуваме со граѓанскиот сектор за да изградиме отпорност против манипулации и странско информациско штетно влијание.“

Дискусиите и работилницата беа предводени од авторите и истражувачите за Методологијата, Тијана Морача и Федерико Сикурела, а воведен збор имаше и Ана Ревенко, раководителка на Центарот за стратешка комуникација и справување со дезинформации од Република Молдавија, истакнувајќи го најновиот пример со оваа проблематика за време на изборите во Молдавија, кои завршија викендот. Темите опфатија социо-политички фактори на FIMI и поттикнувачите во индустријата за информациски манипулации.

Следната година, Методологијата треба да добие финална верзија и да може веќе преку конкретни чекори за нејзина примена од страна на ГО, да им овозможува да се залагаат за транспарентни изборни процеси на глобално ниво.