ЗНМ и ССНМ продолжуваат со регионалните средби со новинари во пелагонискиот регион
Со присуство на триесетина новинари и медиумски работници од регионалниот центар на ЗНМ од Битола, ЗНМ и ССНМ организираа работна средба на која беше дискутирано за теми кои ги засегаат колегите дописници, нивниот статус и условите во кои работат. На средбата беа присутни и медиумски работници од Прилеп и со присутните беа споделени искуства со кои се соочуваат секојдневно посебно во време на вонредната состојба.
На почетокот на средбата на присутните им се обрати претседателот на ЗНМ Младен Чадиковски кој истакна: ,, Ме радува што денес се собравме поголем број на колеги и сакам да го споделам со вас моето задоволство што конечно лично може да се видиме и поразговараме за важните прашања и предизвици со кои се соочувате во овој регион на државата. Во изминатиот период ЗНМ и ССНМ учествуваа во изнаоѓање на решенија за тешката положба во која се наоѓаат новинарите и воопшто медиумите. Бесплатната медицинска опрема во време кога немаше, бесплатните антиген тестови, вакцините, економските мерки за помош и намалување на давачките на медиумите кон државата се само дел од активности на кои бевме посветени во изминатиот период. ЗНМ и претходно но и во иднина продолжува да биде конструктивен партнер во изнаоѓање на предлози и решенија кои секој член може да ги предала а посебно и за финансиска помош преку креирање на т.н. фонд за медиуми кој би бил од исклучителна важност посебно за локалните и регионалните медиуми.“ посочи Чадиковски.
На работната средба од страна на колегите од Битола и Прилеп беше споделено дека проблем е возраста на новинарите и медиумските работници кои работат во пелагонискиот регион, односно немањето интерес од страна на младите да се занимаваат со оваа професија пред се поради тешката економската состојба. Координаторката во пелагонискиот регион Жанета Здравковска истакна дека основните проблеми се од финансиски карактер. ,,Медиуми пропаѓаат, новинарите си заминуваат и се во многу тешка состојба, но сепак идејата и најавата од страна на претседателот на ЗНМ, Чадиковски за изнаоѓање на финансиска поддршка на медиумите се позитивни чекори кои се нужни ” потенцираше Здравковска.
Свое обраќање пред присутните колеги имаше и заменик претседателката на ЗНМ Филјана Кока која го истакна своето задоволство од средбата и потенцирање дека: ,,во овој момент е многу важно солидарно да се поддржи ЗНМ во процесот на креирање политиките кои треба да се во интерес пред се на новинарите”. По неколку часовната дискусија со присутните беше констатирано дека ваквите зачестени средби со новинари и медиумски работници на регионално ниво ќе ја зацврстат и унапредат меѓусебната комуникација и соработка на новинарите и медиумските работници од пелагонискиот регион.
