ЗНМ и Мисијата на ОБСЕ во Скопје одржаа летен камп за безбедност на млади новинари
Здружението на новинарите на Македонија (ЗНМ) во соработка со Мисијата на ОБСЕ во Скопје од 11-ти до15-ти јули 2023 година одржаа летен камп за млади новинари во Охрид. Темата на овогодинешната средба беше безбедност на новинарите во рамките на нивната работа.
Целта беше преку дружење и размена на искуства и практични вештини да придонесе кон градење на капацитетите и подобрување на севкупната безбедност на новинарите преку промовирање на подобра соработка меѓу колегите, споделување на локално искуство и подобро разбирање на родовите димензии на безбедноста.
На отворањето на летниот камп се обрати Алесио Ѕукарини, шеф на Одделот човекова димензија/в.д заменик-шеф на Мисијата на ОБСЕ во Скопје и истакна дека денес мора да се справиме со предизвиците со кои се соочуваат новинарите и онлајн и офлајн.
„Дигиталната ера донесе со себе нов сет на предизвици. Новинарите се соочуваат со зголемен број на дезинформации, сајбер напади и ерозија на довербата. Сепак, ние имаме способност да ги надминеме овие пречки. Со негување на дигитална писменост, практикување етичко новинарство и соработка со ИТ експерти, можеме да изградиме отпорен дигитален пејзаж каде вистината може да надвладее над лагата. Дозволете овој камп да послужи како платформа за вашиот развој додека учите, споделувате и работите заедно со вашите колеги новинари. Заедно, можеме да изградиме иднина во која безбедноста на новинарите е приоритетна, слободното изразување е заштитено и слободата на медиумите е загарантирана.“
На отворање на кампот се обратни извршниот директор на Здружението, Драган Секуловски.
„ЗНМ и ОБСЕ имаат стратешка соработка во последните неколку години а овој камп за безбедност за новинари кој се организира втора година по ред има за идеја да стане традиционален настан. Новинарите кои се под 35 години ги сметаме за млади а тие се само стотина професионалци во секторот што навистина е загрижувачки. Преку вакви настани освен тоа што ЗНМ придонесува во градење на нивните капацитети ја поттикнуваме и меѓу редакциската соработка земајќи во предвид дека присутни се новинари од 20тина медиуми“ – кажа Секуловски.
За време на кампот, клучен акцент беше даден токму на физичката и дигиталната безбедност за новинарите, професионалните вештини и знаењата за новинарската етика и улогата на новинарите во одбраната на човековите права користејќи темелни новинарски техники, нови пристапи и дигитални мултимедијални алатки, вклучително и оние развиени од Мисијата на ОБСЕ. Исто така, беа разговарани и последните измени на Кривичниот закон и Законот за граѓанска одговорност од клевета и навреда и што овие измени значат во пракса за работата на медиумските работници.
Во рамките на активностите кои беа предвидени во работниот дел на летниот камп, покрај едукативни презентации водени од искусни тренери, имаше и интерактивни работилници и работа во групи преку неформални средби и заеднички дружби каде што се разменија и практични искуства помеѓу предавачите и учесниците.
Во делот на едукативни презентации свои излагања имаа Димитар Димитровски од ОБСЕ, новинарите на ИРЛ, Сашка Цветковска, Давид Илиески и Александра Денковска Гоцевска како и новинарите од 360 степени, Среќко Поповски и Славица Филиповска. Свои излагања имаше и Милан Спировски од ЗНМ како и колегите Перо Момировски и Дарко Дуридански од ССНМ.
На кампот претставник од МВР со свое излагање беше Тони Ангеловски, помошник на министерот за односи си јавност.
Учесниците исто така имаа можност да научат техники на физичка самоодбрана, кои во иднина ќе можат да ги користат доколку се најдат во опасност, а за учесниците беше изработена посебна програма од страна на колегата Бујат Саити, фасилитатор и аниматор.
Оваа активност е продолжение на соработката на ЗНМ и Мисијата на ОБСЕ во Скопје кои во претходните години заедно беа активни на теми поврзани со безбедноста на новинарите и градење на капацитетите на ЗНМ.
Фото: ЗНМ
