Здружението на новинари на Македонија (ЗНМ) со поддршка од страна на Фондацијата Конрад Аденауер (КАС), организираше тридневна работилница насловена како „Младите новинари како шанса за нова ера на медиуми со интегритет и влијание“.

Во првиот дел од тро дневната работилница, свое обраќање имаше претседателот на Здружението на новинари на Македонија (ЗНМ), Младен Чадиковски кој ја истакна важноста на улогата на младите новинари во унапредувањето на стандардите на еснафот во државата. ,,Преку градењето на капацитетите и унапредувањето на условите за работа во редакциите како и подобрувањето на соработката на младите новинари со своите поискусни колеги во редакциите се потврдува стратешката цел на ЗНМ за поактивно вклучување на младите во креирањето на професионален амбиент за работата на новнарите”. – потенцираше Чадиковски.

Поздравно обраќање имаше и извршниот директор на ЗНМ, Драган Секуловски кој ја претстави и новата публикација која беше изработена во изминатиот период насловена како  „Младите новинари како шанса за нова ера на медиуми со интегритет и влијание“ (публикацијата може да се најде на македонски и албански).

Во работниот дел кој беше спроведен во форма на дебатен форум, свои излагања имаа новинарката, ко-основач на Истражувачката Репортерска Лабараторија (ИРЛ) Сашка Цветковска и новинарката од Балканската истражувачка репортерска мрежа (БИРН), Ана Петрушева.

Сашка Цветковска од ИРЛ ја водеше сесијата за Истражувачки приказни и иновација во презентирањето – Од нула до производ: Концептот на ИРЛ/ПИОКК. Таа пред младите колешки и колеги зборуваше за практиктите кои ги има ИРЛ во напредно известување а по стандардите на Проектот заизвестување за организиран криминал и корупција – OCCRP како и за последните теми кои ги обработуваат како редакција а поврзани со висока корупција и злоупотреба на власт.

Новинарката, Ана Петрушева ги сподели своите искуства од својата долгогодишна работа во новинарството посочувајќи на проблемите и предизвиците со кои се соочуваа и се уште се соочуваат новинарите и медиумските работиници. „Во ваков контекст, млади новинари има се помалку и многу редакции се соочуваат со сериозен проблем да најдат новинари. Затоа, овој тип на обуки се важни за младите новинари да добијат не само можност да слушнат искуства од други медиуми и историски преглед како се менувале работите, но и околу професионалните стандарди и црвените линии во професијата.“ – изјави новинарката, Ана Петрушева.

Во вориот дел од работилницата на темата ,,Создавање на инфраструктура за аналитички вештини и Истражувачки техники и собирање на податоци; организирање на истражување – Meet Aleph” како гости говорници пред учесниците свои излагања имаа Давид Илиевски истражувач и продуцент во ИРЛ како и Лука Блажев, графички дизајнер во ИРЛ.

Во третиот дел од работилницата, новинарот Среќко Поповски во својата презентација потенцираше дека ваквите работилници придонесуваат младите новинари да ги сфатат разликите меѓу т.н. обичното новинарство и продлабоченото. „Тие имаат можност да се запознаат со истражувачките алатки кои им стојат на располагање и за начините на кои тие се користат, но и за стандардите и начелата кои треба да се почитуваат при изготвувањето на таквиот тип теми. Она што е особено важно е дека тие имаат прилика да разберат дека фокусот на нивната работа не се тие, туку темата која ја работат.“- изјави новинарот, Среќко Поповски. На тридневната работилница од 22 до 24 јули во Охрид, учество земаа новинари/новинарки од повеќе редакции опфаќајќи ги традиционалните и новите медиуми.

За време на работилницата беа споделени искуства за развојот на новинарството но и проблемите и предизвиците во новинарската професија. Тридневната работилница заврши со иницијатива за формирање на секција на млади новинари во рамки на Здружението на новинари на Македонија (ЗНМ) за што повеќе активности ќе следат во септември.