Здружение на новинарите на Mакедонија
Членка на Mеѓународната федерација на новинари IFJ
Основано 1946

ЗНМ: Институциите итно да постапат за заканите кон Јордановска и Коровешовска

ZNM
Monday 13 January, 2020Monday 13 January, 2020/ Monday 13 January, 2020

Здружението на новинарите на Македонија најостро ги осудува заканите и навредите упатени кон уредничката на „ТВ Алфа“, Искра Коровешовска од страна на лицето Емил Јакимовски. Ова е истиот заканувач кој неодамна на сличен начин испрати закани и до новинарката Мери Јордановска.

Загрижува фактот што во двата случаи, заканите содржат елементи на родова дискриминација, а ваквиот притисок кон жените новинари е сериозна пречка за слободата на изразување, слободата на медиумите и правото на граѓаните да бидат информирани.

ЗНМ е во контакт со Министерството за внатрешни работи за двата случаи од каде ни беше ветено дека ќе работат на целосно расчистување на овие напади. Го повикуваме и Основното јавно обвинителство да одигра активна улога во насока на брзо истражување на заканите со цел да се превенираат слични случаи во иднина.

Неказнивоста на ваквите дела ја доведе земјата на 95 место на светскиот индекс за слободата на медиумите на „Репортери без граници“, затоа апелираме на брзо и ефективно процесуирање на овие предмети.

Ги охрабруваме колегите да не подлегнуваат на ваквите закани и навреди и истите да ги пријавуваат во ЗНМ, со цел да се крене свеста пред граѓаните дека насилството кон новинарите е недозволиво, но и да се мотивираат надлежните институции активно да ги штитат нашите колеги.

Исто така, овие закани треба да бидат дополнителен мотив за Министерството за правда и Собранието на РСМ за измена и дополнување на Кривичниот законик преку кој ќе се гарантира поголема безбедност и сигурност за новинарите и медиумските работници.

Print Friendly, PDF & Email
Facebooktwitterlinkedin