Заедничка работилница на ЗНМ и Лекарската комора на Македонија: „Стручен надзор и лекарска грешка – концепти и разлики“

Здружението на новинарите на Македонија (ЗНМ) со Лекарска комора на Северна Македонија организираа работилница на тема „Стручен надзор и лекарска грешка – концепти и разлики“ чија цел е унапредување на соработката и меѓусебното разбирање помеѓу двете фели. 

Настанот го отвори Мишко Иванов, член на Управниот одбор на ЗНМ кој ја поздрави иницијативата за ваков вид средби бидејќи на тој начин ќе се подобри односот помеѓу новинарите и лекарите.  

Ирена Мулачка, новинарка која известува за теми од здравство зборуваше за истражување за лекарски грешки преку примери од пракса низ годините, каде што учесниците имаа можност да се запознаат процесот на добивање сторија, истражување, чекање на информации, барање докази, изјави од повеќе извори и на крајот, објава на приказната. Мулачка зборуваше и за одговорноста која ја имаат и новинарите пред јавноста во врска со стории од област здравство, посебно кога станува збор за сензитивни теми. 

Пред присутните се обрати и претседателката на Лекарска комора, проф д-р Калина Гривчева Старделова која се задржа на правата, обврските и надлежностите на комората, како и на информациите во врска со процедурите на работа кои можат и смеат да бидат споделувани со јавноста, односно како се одвива стручниот надзор во земјава и во земјите од Европа. На тема надлежности и активности, се обратија Д-р Рената Станков, директорка на ДСЗИ и проф. д-р Александар Станков, кој е на чело на Судска медицина. 

Двете организации се согласни дека постои потреба за подигнување на нивото на соработка и комуникацијата меѓу новинарите и лекарите преку активности со цел унапредување на положбата на лекарите и медиумските работници во кризни состојби,  реализација на заеднички активности насочени кон едукација со цел подигнување на квалитетот на медиумското известување поврзано со прашања од здравствената сфера.  

За време на дискусијата се вклучија учесниците од двете страни со предлози за конструктивна  соработка во иднина, со цел да се зголеми транспарентноста и достапноста на докторите од една страна, а од друга страна да се запазат принципите на известување кај новинарите, односно секогаш да се почитува Кодексот за етика.