Дали постои родова еднаквност во медиумите и колку се безбедни новинарките и медиумски работници

Здружението на новинарите на Македонија и Синдикатот на новинари и медиумски работници изминатиот период заеднички работеа на кревање на свеста за безбедноста на новинарите и медиумските работници. За таа цел беа креирани две видеа каде што соговорнички беа Зорана Гаџовска – Спасовска, новинарка во Радио Слободна Европа, Ферикан Илјази Арифи, новинар во Euronews Albania, Нита Старова, проектна координаторка за родови прашања во Фондација Фридрих Еберт Скопје и автор на анализата на ЗНМ за родова дискриминација во медиумите и Д-р Ивана Стојановска, Раководител на Одделение за поддршка на работата на Директорот и односи со јавност, Агенција за аудио и аудиовизуелни медиумски услуги.

Видеата беа промовирани на 3 -ти мај, за време на завршиот настан на Меѓународниот ден на слободата на медиумите под мотото: „Безбедни новинари и медиумски работници за квалитетно новинарство во Северна Македонија“ во чии рамки се одржа изложба на фотографии со наслов „Сликни го твојот глас“ кои прикажуваат како е да се биде жена новинарка, медиумски работник во Македонија.

Целта на видеата е да се испрати пораката за постоења на свест за неопходноста од подобрување на безбедноста и социо-економската средина за новинарите и медиумските работници, како начин за унапредување на слободата на изразување кои се основни човекови права, а воедно и да се зајакне улогата на медиумските здруженија во процесот на креирање политики.

Видеата се реализирани со финансиска поддршка од Балканскиот труст за демократија, проект на германскиот Маршалов фонд на САД и Норвешка Министерството за надворешни работи.